Skip to main content
Heim » Turar 2025 » Jubileumstur til USA med historikar Rasmus Sunde

Jubileumstur til USA med historikar Rasmus Sunde

19. - 28. juli 2025.

I 2025 er det 200 år sidan den første organiserte utvandringa til Amerika starta, då 52 personar drog ut frå Stavanger med Restauration. Denne hendinga vil bli storleg feira både her i landet og i USA. Vi i Fotefar er glade for å kunne arrangere denne jubileumsturen, der vi får ta del i feiringa og oppleve kor sterke dei norske røtene framleis er på den andre sida av havet.  

Totalt utvandra det ca. 850 000 personar frå landet vårt, og dei fleste slo seg ned i Midtvesten.  På denne turen gjennom dei tre statane Minnesota, Wisconsin og Iowa reiser vi i fotefara til dei norske immigrantane. Vi får oppleve både små og store byar og elles møte både det «norske» og det moderne Amerika. Framfor alt vil vi på denne reisa komme i kontakt med etterkommarar av utvandrarar frå landet vårt.  

Høgdepunktet på turen vert Nordic Fest i Decorah som varer i tre dagar, der det i år blir ei stor feiring av 200-årsjubileet for utvandringa. I tillegg får vi med oss storbyane Minneapolis og Madison og eit heilt spesielt måltid på Owamni by The Sioux Chef som serverer mat med røter frå Sioux-stammen sine tradisjonelle rettar. 

Emigrasjonshistorikaren Rasmus Sunde er fagperson på denne svært innhaldsrike turen. Han er spesialist på utvandringa frå Norge, har doktorgrad på emnet og har solid erfaring som turleiar til Midtvesten med 23 turar dit.

[ Lukk ]
Søk

Bildegalleri

Dagsprogram

  • Atterhald om endringar

    Teiknforklaring for måltid inkludert i prisen:
    (F) Frukost
    (L) Lunsj
    (M) Middag

  • Dag 1: Laurdag 19. juli – Avreise til Minneapolis

    Avreise frå Oslo ved lunsjtider via Keflavik. Det er mogeleg å reise frå andre byar på førespurnad. På grunn av tidsforskjellen er vi framme i Minneapolis seint på ettermiddagen. Derifrå køyrer bussen oss direkte til hotellet vårt i den vesle, koselege byen Northfield. Då er det tid for noko å ete på hotellet eller på ein restaurant i byen.

  • Dag 2: Søndag 20. juli - Til Urland Church, farmbesøk og St. Olaf college

    Etter frukost tilbyr vi ein halvdagstur i det norske området rundt byen og til det kjende St. Olaf College inkludert lunsj. (Mogeleg val mot tillegg i pris) Vi startar med busstur  gjennom Sognedalen til Urland Church. Her blir vi med på gudsteneste med kyrkjekaffi i den vakre kyrkja. Vi går rundt på gravplassen og kikkar på alle dei norske namna. Deretter køyrer bussen oss til ein stor farm som driv med mjølkeproduksjon. Eigarane er norskætta, og vi får omvising. Etterpå køyrer bussen til det kjende St. Olaf college som vart starta av norske immigrantar i 1874, og som både kong Olav, kong Harald, dronning Sonja og kronprins Haakon har besøkt. Her blir det stor lunsj og omvising både inne og ute på det flotte skuleanlegget.  

    Dei som ikkje er med på utfluktene, nyttar tida til eigen disposisjon i Northfield. Byen har mange små, trivelege butikkar og fleire galleri og museum. Om ettermiddagen har alle tid på eiga hand i den koselege småbyen. 

    Om kvelden møtest vi til fellesmiddag berre for gruppa vår. 
    (F, M) 

  • Dag 3: Måndag 21. juli – Norskedalen, Westby og Madison

    Etter frukost startar vi bussturen austover og køyrer til La Crosse og vidare til Norskedalen, som har eit svært interessant ute- og innandørsmuseum. Deretter stoppar vi i den «norske» byen Westby og får servert lunsj på Westby Historical Society. Her møter vi eldre folk som enno snakkar norsk. Dette er eit område der dei er svært opptekne av dei norske røtene sine, og i Westby feirar dei difor 17. mai i heile tre dagar! Til slutt denne dagen når vi fram til Madison som er «hovudstaden» i Wisconsin med ca. 200 000 innbyggjarar. Etter vår meining er dette den vakraste byen i Midtvesten. 

    Vi sjekkar inn på det flotte hotellet vårt, der skal vi bu i tre netter. Etter middag på eiga hand eller saman med reiseleiar, kan dei som ønsker det, vere med ein liten tur «på byen».  
    (F, L)

  • Dag 4: Tysdag 22. Juli - Slektsgransking, småbyen Stoughton, Livsreise og Sons of Norway

    Etter frukosten går vi den korte vegen til Norwegian Genealogical Center som er den største institusjonen for norsk slektsgransking i USA. Her blir det orientering om senteret sitt arbeid, og Rasmus vil halde eit foredrag om den norske utvandringa. Vi gir oss god tid på senteret, og dei som er spesielt interesserte i slektsgransking, kan sjølvsagt nytte meir tid her om onsdag.  
     
    Etter besøket på senteret kan ein bli med på ei stor utflukt med guiding, museumsbesøk, middag og dans til den «norske» småbyen Stoughton som ligg litt søraust for Madison (mogeleg val mot tillegg i pris). Her feirar dei også 17. mai i tre dagar. På bussturen dit får vi høyre om dei norske settlementa og småbyane i området. Vel framme i Stoughton er det tid for lunsj på eiga hand før vi får omvising i det berømte opera-huset i byen. Deretter besøker vi Norwegian Heritage Center som blir kalla Livsreise. Museet fortel historia til dei norske immigrantane som slo seg ned i Wisconsin. Dette tek rundt ein time. Vi har så noko tid på eiga hand før vi møter Sons of Norway-medlemmer til middag og fellesprogram med dans til slutt. Retur til Madison med bussen vår utpå kvelden. Dette er ei utflukt vi sterkt anbefaler alle til å melde seg på. 
    (F)

  • Dag 5: Onsdag 23. juli – Capitol-bygningen, stauten av Hans Christian Heg, State Street, universitetsområdet

    Om morgonen ruslar vi den korte vegen over gata til den vakre og mektige Capitol-bygningen (hovudstatsbygningen i Wisconsin), og her får vi omvising. På plassen framfor Capitol-bygningen står ein statue av den legendariske norske offiseren i borgarkrigen, oberst Hans Christian Heg, og Rasmus fortel om livet hans. 

    På vegen vidare kikkar vi på Monona Terrace. Dette bygningskomplekset vart teikna av den verdskjende arkitekten Frank Lloyd Wright. Vi ruslar vidare saman med reiseleiarane ned hovudgata State Street til det flotte universitetsområdet. Her kan vi sitte ute ved innsjøen Lake Mendota, sjå på folkelivet og kosa oss. Det er tid for lunsj på eiga hand, og vi vil føreslå universitetskantina i Memorial Union Terrace.  

    Ettermiddagen til fri disposisjon. Kvar onsdagskveld kl. 19.00 i juni og juli er det ein stor, gratis utekonsert ved Capitol-bygningen med Wisconsin Chamber Orchestra. Desse konsertane samlar tusenvis av tilhøyrarar og må berre opplevast. Folk tek med seg campingstolar og bord og kosar seg med mat og drikke som dei tek med seg, men vi kan kjøpe det vi treng frå dei mange salsbuene. 
    (F)

  • Dag 6: Torsdag 24. juli – Cabela, kyrkjelunsj i Utica Church, og Nordic Fest

    Denne dagen skal vi køyre til Decorah og ha nokre stopp undervegs. Difor startar vi frå hotellet kl. 08.30, og første stopp er på Cabela i byen Prairie du Chien. Dette er ei av verdas største sportsforretningskjede. Deretter går turen til Ferryville i Crawford County. I dette området slo mange norske emigrantar seg ned. I Utica Church møter vi fleire av norsk ætt, og her blir det ein stor lunsj. 

    Vi reknar med å vere framme i Decorah i Iowa utpå ettermiddagen. Denne byen har ca. 8.000 innbyggjarar og er ein av dei mest «norske» byane i heile USA. Vi tek inn på hotellet vårt der vi skal bu i to netter.  

    Etter litt avslapping køyrer bussen oss til sentrum av Decorah (ca. 2 km), og vi vert med på opninga av Nordic Fest ved Town Hall. Dette er ein storslegen festival som varer i tre dagar og har eit utruleg variert program med ekstra arrangement på grunn av 200-årsjubileet. Bussen vår køyrer oss frå hotellet til sentrum og tilbake fleire gonger medan vi er i byen. Middag på eiga hand, men reiseleiaren gir råd om kor vi kan ete. 
    (F, L)

  • Dag 7: Fredag 25. juli – Decorah og Nordic Fest

    Etter frukost tek bussen oss til sentrum, eller vi kan spasere dit. Alle bør ta seg tid til å sjå det norske Vestrheim-museet som er det største etniske museet i USA. Turdeltakarane har dagen til fri disposisjon for å vere med på dei mange aktivitetane under Nordic Fest og elles rusle rundt i den trivelege byen. Heile dagen er byen full av musikk, underhaldning og ulike aktivitetar med eit yrande folkeliv. Det blir nok også markering av 200-årsjubileet for utvandringa denne dagen. 

    Om kvelden samlast turgruppa til ein frivillig fellesmiddag på ein flott restaurant med ein utsøkt middag.   
    (F) 

  • Dag 8: Laurdag 26. juli – Elveløpet, stor parade og møte med norskamerikanarar

    Tidleg om morgonen kan dei spreke og morgonfriske delta på eit stort mosjonsløp, det såkalla Elveløpet, der vi kan både gå eller springe på tid. Nær tusen personar stiller til start, og nokre av deltakarane våre bruker å delta. Få med deg denne opplevinga! 

    Deretter er det ein stor parade i hovudgata. Dette er høgdepunktet under Nordic Fest og samlar mykje folk. Totalt reknar ein med at om lag 30.000 personar besøker Decorah desse dagane. Her vil vi møte mange etterkommarar av norske emigrantar. 

    Utpå ettermiddagen køyrer bussen vår oss nordover til Minneapolis. På veg dit møter vi gjerne på Amishfolk langs vegen med hest og vogn. Dette er ei streng religiøs gruppe som utvandra frå Sveits og Tyskland på 1700-talet. Dei lever svært enkelt utan moderne hjelpemiddel.  

    Etter at vi har sjekka inn på hotellet og slappa av litt, kan ein velje mellom å ete middag på hotellet eller bli med på ei heilt spesiell matoppleving (mogeleg val mot tillegg i pris, pris kjem seinere) på Owamni by The Sioux Chef, som vart kåra til den beste nye restauranten i USA i 2022. Her lagar Oglala Lakota-kokken Sean Sherman utsøkt mat utan ein einaste ingrediens innført etter at Columbus oppdaga Amerika. Dette blir ei stor oppleving! 
    (F) 

  • Dag 9: Søndag 27. juli – St. Paul og Mall of America

    Etter frukost blir det sightseeing i tvillingbyane Minneapolis – St. Paul. Desse byane dannar eit samla byområde med 2,5 millionar innbyggarar, og dei fleste har skandinaviske eller tyske røter. Dennis Gimmestad med slekt frå Nordfjord vil vere guiden vår denne dagen saman med Rasmus Sunde. 

    Vi køyrer først til Luther Seminary som er ein utdanningsinstitusjon for prestar og grunnlagd av norske immigrantar. Her ser vi på Loen-krossen før vi går til Muskego kyrkja der Rasmus orienterer. Denne kyrkja er bygd i 1844 og er den eldste norske immigrantkyrkja i Amerika. 

    Deretter held Dennis fram med guidinga i storbyen før vi køyrer til St. Paul til den storslegne og flotte Capitol-bygningen, der vi tek oss god tid. I framgrunnen står det ein statue av Knute Nelson frå Voss. Han er den immigranten frå Norge som har nådd lengst i politikken i USA, først som guvernør i Minnesota og i mange år som senator i Washington. Statuen er sett opp i takksemd for innsatsen hans for staten Minnesota. Vi stoppar så opp ved den store statuen av Leiv Eriksson, og her får vi høyre om det store jubileet i 1925 og om 200-års jubileet no i 2025. 
     
    Etter guiding i St. Paul tek bussen oss til Mall of America, som er eitt av verdas største butikksenter med ei mengd aktivitetar og butikkar.   

    Vi har også eit tilbod om lunsjcruise på elva Mississippi med hjulbåt (mogeleg val mot tillegg i pris) Dette er ei stor oppleving og ei fin avslutning på turen til Midtvesten.  

    Buss frå lunsjcruiset tilbake til Mall of America og vidare til flyplassen. 

    Avreise med Icelandair frå Minneapolis om kvelden. 
    (F)

  • Dag 10: Måndag 28. juli - Heime i Norge

    Mellomlanding i Keflavik og framme i Oslo om føremiddagen.

Avgangar & prisar

AvreisedatoAvreisestadHotellLedige plassarFrå pris
19/7OsloMidtvestenMeir enn 836 950,-BestillMer informasjon
Les meir om Midtvesten»
Reisekalender
2/2Argentina og Uruguay med Eva Bratholm og Joar Hoel LarsenFrå 49 950,-
Kontakt oss
Telefon: 918 20 304
Våre telefontider er 09.00 til 12.00.
E-post: post@fotefartemareiser.no
Adresse:
Fotefar Temareiser AS
Sognefjordvegen 40
6863 Leikanger
Kontaktskjema
  • RGF Logo
Powered by Travelize